Auzoko guztiei. Ama Shantalen eguna bertan dugu eta harekin, etenaldiak izan arren, tradizio handia duten auzoko jaiak

Badira 9 urte gazte talde batek auzoko jaiak berreskuratu genituela. Urte hauetan jaiak handitu egin dira, baina haien antolakuntza berdina izaten jarraitzen du. Otsaila-martxo aldean asanblada ireki bat martxan jartzen dugu eta honek hartzen ditu jaien inguruko ardura guztiak: baimenak lortzea, programa lotzea edota finantziazioa. Edonorrek har dezake parte asanbladan eta guk hortara animatzen zaituztegu!

Lan horren fruitua abuztu erdialdean jasotzen da. Auzotik 100dik gora musikari, aktore, bertsolari, pailazo, dantzari edo DJ pasatzen dira.

Ez dugu inungo subentziorik. Kamixeten salmentak, bazkari herrikoiak, txosnak eta taberna eta komertzioen laguntzak egiten dituzte jaiak posible. Eta noski, bere denbora librea bolondres dedikatzen duen jende askoren ilusio eta lanak.

8 urtez ordutegi berdinak mantendu ta gero, iaz Irungo Udaletxeak kontzertuen ordutegia aldatu zuen. Abisatu gabe. Jaiak hasten ziren egunean bertan jakinarazi ziguten 2 ordu gutxiago genituela eta irtenbiderik gabe utzi gintuzten: kontzertuak bertan behera utzi, eta Iruneraino kanpotik etorritako taldeei berdin ordaindu; edo ordutegi berria ez bete. Betiko ordutegiakin jarraitzea erabaki genuen. Ondorioz, nahiz eta udaletxetik 'komunikazio akats' bat egon zela onartu, 1.400 euroko multa ordaindu dugu.

Hala ere, aurrera egingo dugu. Urteetan zehar gure auzoan kalitatezko kultura debalde eskeini dugu, edozein baliabide ekonomiko dituen edozein pertsonak disfrutatu ahal izateko. Oraingoak bezelako garai latzetarako auzolana, lan komunitarioa eta ilusioa errezetarik onenak direla uste dugu.

Aurten ekimen berri bat martxan jarri nahi dugu. Auzoan utzita eta hondatuta dagoen espazio bat berreskuratzea. Lan komunitarioaren bitartez egingo dugu, baliabide gutxi baina gogo handiarekin. Uste dugu autojestioaren bitartez auzokideek, jaietan bezala beste arlo batzuetan ere, geure ingurunea eta bizi-baldintzak hobetu ditzazkegula. 

Jaietan parte hartzera eta gozatzera gonbidatzen zaituztegu!

2012ko abuztua. Moskuko Jaien Asanblada