Abuztuak 18, 19, 20 eta 21ean Moskuko Jaiak ospatuko dira

(castellano más abajo)
Azpimarratzekoa da Igandeko bertso saioa, Maialen Lujanbio arituko da

Irun 2011ko abuztuak 11. - Moskuko Jaiak abuztuak 18 eta 21 artean ospatuko dira eta Moskuko Jai Asanbladak antolatutako programak adin guztietarako ekimen ugari ekarriko ditu. Ekimen guztiak debaldekoak dira bazkari herrikoia izan ezik. Honek 10 euroko prezioa izango du.

Lau jai egunetan zehar Mosku auzoa, urtero bezala, jendeak ekimen eta aktibitate ugariz gozatzeko topagunea izango da. Helburua edozein ekimenetara gerturatzen diren pertsona guztiek parte hartzea eta ongi pasatzea da. "Horretarako adin guztietara zuzendutako programa antolatu dugu" diote Asanbladatik.

Ostegun 18an, berotzen hasteko, Fermin Muguruzak Al Jazeera telebistarentzat egindako "Next Station: Sudan" dokumentalaren Euskal Herriko premierea izango da Kabigorri Ateneoan. 21.00tan, Asthmatic Lion Sound Systemaren musika saioa egongo da.

Ostirala 19an, 17:00tatik aurrera ohitura bilakatzen ari den 'Azoka' ospatuko da. Partehartzea libre izango da eta bakoitzak bere postua jarri ahalko du bertan erakusgai duena saldu edo elkartrukatzeko. Etxeko txikienentzat txokolatada egongo da 19.00tatik aurrera, txalapartaren soinuak musikak girotutako plazan. 21:30tatik aurrera kontzertuak hasiko dira Anai-Arrebak (Pasai Donibane), The Rifftruckers (Gernika) eta Capsula (Bilbo) taldeen eskutik. Jaietako lehen egun honen amaiera gisa DJ maratoia egongo da auzoko tabernetan.

Larunbata 20a gustu guztientzako egun betea izango da. Txikienek 12.00tan dute hitzordua Urdanibia Plazan haur jolasekin. Bazkari Herrikoia 14:00etan ospatuko da eta ondoren Bertsotrikipoteoaren txanda izango da. 18:00ak aldera Bonbereneako Txarangak kaleak kolore eta dantzaz beteko ditu. Jada gauez, 21:30etan kontzertuak egongo dira Luz de Putas (Irun), The Capaces (Bartzelona) eta Willis Drummond (Lapurdi) taldeen eskutik.

Igandean, dantza gogoko dutenek zita dute 11.30tan Kemen Dantza Taldearekin. Ondoren, eta iazko arrakasta ikusita, 12.00tan bertso saioa ospatuko da plazan, aurten ere luxuzko kartelarekin. Maialen Lujanbio, Euskal Herriko txapelduna, bertan arituko da Julio Soto, Beñat Gaztelumendi eta Unai Muñoarekin. Arratsaldean sartuta 17.00tatik aurrera sardinadaren momentua izango da, eta ondoren plazan Tres Puntos y Aparte antzerki taldearen eskutik 'Cabaret Aparte' espektakuloa ikusi ahal izango da. Bukatzeko, Aiuri tabernan Morgue eta The Inductions Irungo taldeen kontzertuak emango diete amaiera aurtengo jaiei.

Jai hauek Moskuko Jaietako Asanbladak antolatzen ditu, irabazi-asmorik gabeko gazte taldea. Auzokideek edo eta lau egun hauetan auzora hurbildu nahi duen edonorrek gozatu eta parte hartu ahal izateko aktibitate programa oso bat antolatzeko eta kudeatzeko asmoz joan den apiriletik biltzen aritu dira. Azpimarratu behar da jai autojestionatuak direla, eta finantziazio iturriak kamixeten salmenta, bazkaria, txosna eta urtero beraien babesa ematen duten auzoko dendari eta tabernariak direla.